VIR ONMIDDELLIKE VRYSTELLING | 31 Maart 2022
Sedert 1 Maart 2022 het agt nuwe uitbrekings van bek-en-klouseer in vier provinsies in Suid-Afrika voorgekom.
Limpopo 2 11 Maart 2022
KwaZulu-Natal 2 25 Maart 2022
Noordwes 2 25 Maart 2022
Gauteng 2 28 Maart 2022
Hier volg ’n paar biosekuriteitsfeite wat melkprodusente in ag moet neem:
- Die produsent word geag as verantwoordelik vir die toepassing van ’n biosekuriteitsplan op sy/haar eie grondgebied – kontak u kuddeveearts.
- Besmette plase word gekwarantyn, met gevolglike vernietiging van melk volgens die Wêreldgesondheidsorganisasie (OIE) se neergelegde maatstawwe – toegepas deur die staatsveeartsspan.
- Ongepasteuriseerde varsmelk is ’n virusverspreidingsmedium. Die virus oorleef 15 dae by 4°C in melk. Slegs ultrahoëtemperatuur- (UHT-) pasteurisasie is effektief.
- Die uitbreekgebied word afgebaken as besmette sone of buffersone of opsporingsone of vry sone, wat deur private inisiatief georganiseer word tot voordeel van die produsent. Ondersteun en gee u samewerking aan regeringsamptenare wat biosekuriteit bevorder. Bek-en-klouseer is ’n staatsbeheerde siekte wat volgens wet by ’n veearts aangemeld moet word.
Hier volg ’n paar wenke om uitbrekings te beheer in die uitbreekgebiede:
- MPO-lede behoort ’n naspeurbaarheidstrategie daar te stel om nuwe uitbrekings te identifiseer, te bepaal waarvandaan die infeksie kom, en waarheen dit versprei. Negatiewe status in kompartemente kan as sodanig bewys word vir uitvoermarkte en daaglikse melkinsamelingspunte. Oefen druk uit vir interprovinsiale permittoegang van vee vanaf besmette provinsies.
- Moniteer veilings en abattoirs as strategiese kontrolepunte om epidemiologiese naspeurbaarheid te vergemaklik.
- Boereverenigings behoort verkeersbeheer toe te pas op strategiese distriksroetes, plaaslike veilingskrale en plaassekuriteitshekke.
- Ontsmet melk-, voer-, vee-, voorraad- en dienstevoertuie voordat toegang verleen word by plaassekuriteitshekke. Inspekteer vir mis-, modder-, en beddegoedbevuilde voertuigoppervlakke en klerasie.
- Dring aan op siektevrye sertifikate deur ’n veearts uitgereik met die aankoop van vee. Raadpleeg kundiges vir ’n uitgewerkte risikoanalise vir die boerderystreek wat wetenskaplik regverdigbaar is voordat onredelike maatreëls afgedwing word.
- Implementeer daaglikse personeelontsmetting en toegangsbeheer op die plaas.
Praktiese ontsmettingsmiddels:
Huishoudelike JIK 6% = Natriumhipochloried (NaOCl) verdun 1:10 met water.
Uitgereik deur dr. Theo Kotzé
Melk SA-verteenwoordiger op die Nasionale dieregesondheidsforum (NAHF)
Vir meer inligting, kontak Fanie Ferreira | 083 453 9339 | fanief@mpo.co.za
Published on Thursday, 31st March 2022 - 15:03
Recent Posts
disclaimer